زبیر بلوچ
بی ایس او ءِ سیاست بلوچ وانندہانی سیاست ءِ رژناہیں پگر و سسا انت کہ وتی جوڈ بوہگ ءَ داں روچے مرچی بلوچ ءِ سیاست ءِ توک ءَ تخم ریزی کنان انت پیداک انت ۔ مرچی اگاں بلوچ ورناہ وتی روژناہ پگری ءُ دیمرئی دوستیں سیاست ءِ سرا پکر کنت گڈا دراسل ءَ آ بی ایس او ءِ سیاست ءِ سرا پکر کنگ ءَ انت ۔
1962 ءَ کوئٹہ ءِ مختلفیں تعلیمی ادارہانی بلوچ ورناہاں شور ٹائینت کہ آہاں وتی جیڑہ و جنجالاں بگر داں یکشلی و یکمشتی ءِ واستہ یک گلءِ زلورت انت ۔ داں کہ ما ہمے گلءِ یا پلیٹ فارم ءِ سرا وتی تعلیمی مسلہ ءُ کاراں وتی ہاسٹل و الائنمنٹ ءِ جنجلاں رہائش و فیسانی سردردی ءَ گیش و گیوار بکناں ۔ گڈا ہمے ورناہاں بلوچ وانندہ گل ءِ ناما یک سوسائٹی ءِ ٹائینت ۔اے سوسائٹی مہ شال ءِ ونگجاہانی بلوچ وانندہانی نمائیندہ گل ءِ حثیت ءَ متحرک بوت ۔ ورناہ وانندہ گل ہمینچو وتی کارانی تہا گوشاد ات کہ آئی توار مہ کراچی ءَ جکسیت ۔گڈا کراچی ءِ بلوچی ورناہاں چاریت کہ ما گڈا چیا چوں درگاں درگاں اں مہ چیا چوں بے واہند ءُ شپانک اں ۔گڈا کراچی ءِ سنگتاں وتی کلیں سنگتاں چیت ءُ آرگنائز کت ءُ بلوچ اسٹوڈنٹس ایجوکیشنل آرگنائزیشن ءِ بنہشت ایر کت ۔
ورناہ وانندہ گل ءُ بلوچ اسٹوڈنٹس آرگنائزیشن ہر دوکانی سیاست ءِ مجگ دیمروئی پسند سیاست ات ۔ ہردوکیں گلاں وتی ہند و ہنکیناں اسٹڈی سرکل ءِ بندات کت ءُ بلوچ ورناہاں چہ مارکسی پگروسسا ءَ چے واکپ کت ۔ ہمدا چے بلوچ ورناہاں مارکسی دیمروئی پسندہیں سیاست ءَ بلوچ ءُ بلوچستان ءِ دیمروئی ءِ ءُ لگت مالیں راجہانی ءُ تبکہانی اسودگی ءِ مانزمان سرپد بوتاں ۔
کراچی ءَ ہما زمانگ ءَ Dsf ءِ سرا بندش جنگءَ رند Nsf سرگرم ات ۔گڈا بلوچ ایجوکیشنل آرگنائزیشن ءَ نظریاتی ءُ پگری حوالہ ہمے تنظیم ءِ گوں بازیں جیڑہانی سرا ہواری ءَ کار کت ۔ ہمے زمانگ ءَ بلوچ اسٹوڈنٹس آرگنائزیشن ءَ کراچی ءَ وتی برجم داتگیں کنونشن ءَ اردو ءِ آشوبی شاعر فیض احمد فیض ءَ وتی دیوان ءِ پاگواجہ کت ۔ ہمے دیوان Nsf ءُ دیگہ دیمروئی پسندئیں وانندہ گلانی سروک ءُ نمائیندہ اوں بی ایس ای او ءِ دیوان ءَ لوٹائینگ بوتگ اتنت ۔
ہمے رنگیں دیوان ءُ اشوبی مجلساں بلوچ وانندہ میچور و بالگ کت انت ۔ دومی پائدگ اے رنگیں دیوان ءُ مجلسانی ایش ات کہ بلوچ وانندہانی گوں دیگہ وانندہ گلانی گوما یک نزیکی ءُ ہم اہنگی پیداک بوت۔
ہمے محچورٹی ءُ سیاسی بلاگت ءَ دوئیں بلوچ تنظیمانی نزیکی ءِ واستہ مزنیں کردے پیلو کت ۔ بلوچ اسٹوڈنٹس ایجوکیشنل ارگنائزیشن ءِ او ورناہ وانندے ءِہوار بوہگ ءَ چے بلوچ وانندہ سیاست ءِ نوکیں دورے بنا بیت ۔بلوچ اسٹوڈنٹس آرگنائزیشن 1967 ءَ جوڑ بوت ۔
بی ایس او جدید بلوچ سیاست نشنلزم کہ آئی ءِ بن ہشت میر عزیز کرد ءَ ایر کتگ ات پدا میر یوسف مگسی ءَ دیما برتگ ات گڈا بی ایس او ءِ دیمروئی سیاست آئی ءِ وارث ءُ پشت پد جوڑ بوت ۔ بی ایس او نہ تہنا بلوچ وانندہانی نمائندہ ات بلکیں اے کل بلوچ مہلوک ءِ امیت ات ۔ ایشی ءَ چہ ابید بی ایس او ءَ دگنیا ءِ درائیں لگتمالیں راج ءُ تبکہانی گپ جت ۔ بی ایس او ءِ سیاست ءَ بلوچ چاگرد علم و زانت ءِ شون دات ۔زوراکی ءُ زلمے ھلاپ ءَ جہد و سرو پر ءِ نیمگا سکین دات ۔ بی ایس او دیمروئی پسندیں و روژناہ پگریں سیاست داں روچے مرچی بلوچ چاگردے روژنائیں استال انت ۔ داں بلوچے سیاست مانیت بی ایس او ءِ انسان دوستیں ءُ رژناہ پگریں و دیمروئی پسندیں سیاست ءُ کرد شمشکار نہ بیت ۔
