زبیر بلوچ
تاریخ ءَ اے گپ ءِ شاہد انت کہ آشوبی عمل ہر وہد ءَ بندات ءَ چہ کسانیں توکلی ئیں بلے نظریاتی ءُ علمی ئیں اقلیتاں بنا کتگ بلے کم کم ءَ آہانی مستقل مزاجی ءُ جہد مسلسل ءَ چے ہمے کاروان ءَ راجے ءِ گیشتریں طبقہ ہوار بیتگ انت یا آہانی پلہ مرز ءُ ھمایتی بیتگ انت۔
انقلاب ءِ فرانس ءِ بندات چہ کسانیں حادثے ءِ چہ بیتگ ۔فرانس ءَ ہما زمانگ ءَ وارگ ءُ ناگن ءِ کمی بیت چوناہا ناگن ءِ مسلہ کسانیں مسلہ و جیڑہ ءِ نہ انت کہ کسے بگشیت کہ نگن ءِ ءُ ورگ ءِ جیڑہ کسانیں جیڑہ ءِ۔ ھیر ۔۔۔۔ چہ ہمدا فرانس ءِ مسلہانی بندات بیت ءُ پدا انقلاب ءَ چے آسر بیت ۔امریکہ ءِ انقلاب ءَ اگاں اُرت بچاراں اوں ہمے رنگءَ جنت ۔ چندیں مردمے سلاھ بندیں جہد ءَ چے بنا بیت ءُ گڈ سرا برطانیہ ءِ کشگ ءُ انقلاب ءِ امریکہ ءَ چے آسر بیت ۔ چہ اے دروءَ ابید ہندوستان ءَ بچاریں ہندوستان ءِ آزادی ءِ جنگ چہ جنگ ءِ پلاسی ءِ پروش ورگ ءَ رند بندات بیت پدا جہازانی بغاوت بیت جہازانی بغاوت بمبئی کلکتہ کراچی ءُ درائیں ہندوستان ءِ بندناں پیچاں کنت ءُ مہلوکے توکا اجوئی ءِ ءُ نوابادیاتی نظامے ھلاپ شعورے ودی کنت چہ ہمدا چے ہندوستانی مہلوک ہمے ماریت کہ انگریز ءُ نوآبادکار چہ ہندوستان ءَ ولگوج کنگ بہ بنت ۔
ملائشیا لاوس کمبوڈیا انگولا مصر الجزائر افریقہ ءُ ہر ہما ہند و دمگ کہ ایردست بوتگ انت آہان وتی جہد چہ کسانیں پیمانےءَ بنا کتگ داں سوب مند بوتگ انت۔آشوب ہر وہدا چہ واقعات ئے ءَ بندات بیت ءُ آشوبے ءَ آسر بیت ۔ بلے یک گپ ءِ المی گشگ بہ بیت کہ نظریہ مھکمیں سیاسی پارٹی ءُ وژن المی انت ۔ اگاں مہ بلوچے مرچگین جنزاں ایرادے بگراں گڈا مہ چرے چیزاں ہچ گنداگ ءَ نہ ایں ۔ نہ بلوچ مہلوک ءِ جنزا پارٹی ءِ است نہ مھکمیں نظریہ ئے نظریہ چیا کہ تنیگہ وتی نظریاتی پوزیشن ءَ گیشینگ ءَ بلوچے قیادت ترسئے اماچ انت اے ترس دری ملکانی باہوٹی ءَ اے مردمانی دلا داتگ پرچہ کہ مہلوک دری ملک ءَ اں دری ملک نظریاتی سیاست ءِ پلہ مرزی ءَ کدی نکناں ۔ ہاں یک حسابے ءَ کنتے اگاں کسے پراہاں کاسگ چٹی بکنت ۔ اگاں کسے ءَ کاسگے چٹگے شوک انت گڈا کلہے بلوچانی کیچ دور انت پہ ہنسگے پیچ ۔ پشت کپت مھکمیں پارٹی ءُ وژن اےکل چہ مہلوکے زورا چے جوڑ کنگ بیت بلے بلوچے جنز دنیا ئے اولی جنز انت کہ چہ مہلوکے قوت ءُ بازو بوہگ اوں ترسیت ۔ مہلوکءَ گوں وت ہوار کنگ ءَ چے الرجی انتے ۔ تنئ وہدی اے وڑیں کوشش ءُ جہد گندگ نہ بوتگ کہ بلوچ جہدا ہمے ماریتگ کہ بلوچ مہلوکے زور ءُ زکت ءَ چے جہد برجا دارگ بہ بیت ۔ ھدا بزانت زانا دری ملکان کسئے ءَ شوبینگ بوتگ کہ نبا کنے مہلوک ءَ گوں جنزا ہوار بکنے شما وت ترم کانے ءُ اپلاتونے ۔
ایندگے درائیں گپ ءُ ھبراں بل شہیدانی روچاں ہرکس پہ زاتی تعلقداری ءُ سیادی ءِ بنیادا داریت زاتی سنگتی ءِ بنیاداں پراں نبشتانک نبیسیت زاتی تعلقئے بنیاد ءَ اکسءِ وتی ڈی پی جنت اے وڑیں بازیں گریبیں شہید است انت کہ اے مہلوک ءَ بیال کتگ انت پرچہ کہ گریبی چک بوتگ انت کسی زاتی سنگت نہ بوتگ کمٹمنٹ ءِ گوں زمین ءَ ءُ وتی مہلوک ءَ بوتگ ۔ اے واجہ نوں راجے ھال انت اے جہد ءِ کسہ انت ۔
انقلابی تحریک ءِ بندات نظریاتی پختگی عزم ءُ توکل ءَ چے بیت ۔اگاں مہ سویت انقلاب ءَ بچاراں بنداتی روچاں بلشویک پارٹی کلیں روسی مہلوکے نمائیندہ پارٹی نہ بوتگ بلے لیڈر شپ ءِ مستقل مزاجی نظریاتی پختگی ءُ مھکمی ءَ آئرا کلیں روسی مہلوکے نمائیندہ پارٹی جوڑ کت ءُ انقلاب ءِ کنگ ءَ بالشویک سوبین باں ۔ بلے مئے گورا اے وڑ نہ انت مئے گورا نہ راجی پارٹی است نہ انقلابی پروگرامئے نہ نظریاتی مھکمیں قیادتے کہ آ کلیں بلوچاں بچنت یکمشت بکنت ۔یکمشت پرچہ بکنت واجہ اگاں اے بزگیں مہلوک ءَ بچنت یکمشت بکنت گڈا آئی ءَ وا کس لیڈر نہ کنت لیڈری پدا مہلوکے دست ءَ کیت گڈا واجہ ءَ کجا شات بیت کہ منی ہنچو وہدے واجہی درتہ پچ ءُ لس مہلوکے دست ءَ بہ بیت ۔
بلوچے راجی جنز سک نگیگی ءَ گوں دوچار انت ایشی ءِ مستریں سبب مھکمیں پارٹی ئے نہ بوہگ قیادت ءِ کمی سیاسی ءُ نظریاتی کوردیدی انت اگاں اے عیب کشگ بہ بنت جنز لس مہلوکے دستءَ بہ بیت ۔کمٹیڈ ءُ لائکیں سنگتاں دیما ارگ بہ بیت ۔ جنگی نف خورانی نشاندہی کنگ بہ بیت ھاندانی ءُ سیادی ءِ بنیادا ٹہنتگیں لابی ءُ ٹولیاں مہلوکے دیما پاشک کنگ بہ بیت گڈا بلکیں بزگیں مہلوک پہ وتا شرتریں رائے درگیتک کت بکنت ۔
کجام وڑیں جنزئے بہ بیت تری آ راجی جنزئے بہ بیت یا راجی ءُ طبقاتی جنزئے ءُ نیکراہی جنزئے بہ بیت ایشی ءِ واستہ مظبوطیں مھکمیں ادارئے بوہگ نظریاتی ءُ پگری لائن ءِ درستگی مستقل مزاجی ءُ پختگی بنیادی لوٹ انت ءُ بیدئے چہ اے جزبہ ءَ جہد رنگراہاں گار ءُ بیگواہ بیت راج دلپروش ءُ مایوس بیت ءُ نندیت زمیناں کلونڈیت ۔
